ԱՐՄԵՆԻԱ ԻՆՇՈՒՐԱՆՍ

ԳՆՈՒՄՆԵՐ

Այս պահին բաց հայտարարություններ չկան։

Արխիվացված հայտարարություններ

ԲԱՑ ՄՐՑՈՒՅԹ՝ ԾՐԱԳՐԱՅԻՆ ԼՈՒԾՄԱՆ ՄԱՏԱԿԱՐԱՐԻ ԸՆՏՐՈՒԹՅԱՆ ՀԱՄԱՐ

«ԱՐՄԵՆԻԱ ԻՆՇՈՒՐԱՆՍ» ապահովագրական ՍՊԸ-ն (այսուհետ՝ Ընկերություն) հայտարարում է բաց մրցույթ (այսուհետ` Մրցույթ)՝ Ընկերության «Արհեստական բանականության / մեքենայական ուսուցման և գործարար հետազոտության հարթակի մշակում և ներդրում» նախագծով ծրագրային լուծման մատակարար կազմակերպություն ընտրելու համար

ՄԱՍՆԱԿԻՑՆԵՐ

Մրցույթին կարող են մասնակցել այն կազմակերպությունները, որոնք.

▪ գրանցված են ՀՀ-ում կամ արտերկրում որպես իրավաբանական անձ և չեն գտնվում սնանկության կամ լուծարման գործընթացում

▪ ունեն և կարող են ներկայացնել համանման նշանակության և ծավալի AI/ML և BI համակարգերի նախագծերի իրականացման հաջող փորձ

▪ ունեն B2B և B2G նախագծերով աշխատելու միջազգային փորձ ունեցող անձնակազմ, որը ներառում է․

▪ Project Manager (ICT նախագծերի կառավարում, առնվազն 5 տարվա փորձ),

▪ System Architect (մեծածավալ համակարգերի ճարտարապետության նախագծում, տվյալների բազաներ և ինտեգրացիաներ, առնվազն 5 տարվա փորձ),

▪ ML մասնագետներ (կանխատեսում, կլաստերիզացիա, անոմալիաների հայտնաբերում),

▪ BI/Frontend Developer (դեշբորդների և վիզուալիզացիաների մշակում),

▪ Backend Developer (API և տվյալների բազաների ինտեգրում),

▪ Database Administrator (OLAP և հարաբերական բազաների կառավարում):

ՊԱՅՄԱՆՆԵՐ

1. Նախագծի իրականացման տևողությունը՝ 6 ամիս, հավելյալ 3 ամիս ետսպասարկում, ինչպես նաև ակնկալվում է արտոնյալ պայմաններով 5 տարվա ընդլայնված աջակցության ցուցաբերում։

2. Համակարգի փաստաթղթերը պետք է տրամադրվեն հայերեն և անգլերեն լեզուներով։

3․ Ակնկալվում է, որ Կատարողը.

▪ կիրառելու է Agile և Iterative մշակման մեթոդաբանություն՝ ապահովելով շարունակական հետադարձ կապը և ճշգրտումների հնարավորությունը,

▪ հետևելու է համակարգերի նախագծման, AI/ML մշակման և կիբերանվտանգության ոլորտների լավագույն միջազգային փորձին,

▪ օգտագործելու է հաճախորդակենտրոն նախագծման սկզբունքներ,

▪ ներառելու է ռիսկերի կառավարման մեխանիզմներ, այդ թվում` տվյալների անվտանգության, ժամանակի կորուստների, և ինտեգրման հետ կապված ռիսկերի բացահայտումը,

▪ ապահովելու է պարզ համագործակցություն Պատվիրատուի ներգրավված անձնակազմի հետ՝ աշխատանքների ամբողջ ընթացքում։

ԱՇԽԱՏԱՆՔՆԵՐԻ ՇՐՋԱՆԱԿ

Մատակարարը պետք է իրականացնի համակարգի․

▪ նախագծումը և ճարտարապետության սահմանումը,

▪ ծրագրային ապահովման մատակարարումը և տեղադրումը,

▪ ML մոդուլների նախագծումը և ներդրումը,

▪ անվտանգության, պահուստավորման և բիզնես շարունակականության ապահովումը,

▪ օգտագործողների ուսուցումը և փաստաթղթավորումը,

▪ փորձարկումը և ամբողջական գործարկումը։

ՎԱՅՐ

Մրցույթի կազմակերպման վայրը՝ Ընկերության գլխամասային գրասենյակում։

ՀԱՅՏԵՐԻ ՆԵՐԿԱՅԱՑՈՒՄ

Մրցութային առաջարկները (Տեխնիկական և Ֆինանսական հայտերը) պետք է ներկայացվեն Ընկերություն՝ առանձին փակ ծրարներով, մեկ կնքված փաթեթով, հայերեն լեզվով։

Տեխնիկական հայտում պետք է ներառվի․

▪ առաջարկվող համակարգի նկարագրությունը և համապատասխանությունը TOR-ին,

▪ աշխատանքների իրականացման պլանը և ժամկետները,

▪ նախորդ նմանատիպ փորձի նկարագրությունը,

▪ ներգրավված անձնակազմի ցանկը և փորձը,

▪ որակի ապահովման մեխանիզմները։

Ֆինանսական հայտում պետք է ներառվի․

▪ ընդհանուր գինը, ներառյալ՝ բոլոր հարկերը և պարտադիր վճարները,

▪ լրացուցիչ ֆինանսական տեղեկություններ՝ մասնակիցի հայեցողությամբ։

ԱՆՑԿԱՑՄԱՆ ԿԱՐԳ

Մրցութային առաջարկները կբացվեն և կամփոփվեն մրցութային հանձնաժողովի կողմից 24/10/2025 թ., ժ. 16:30 -ին։ Մասնակիցները կարող են ներկա լինել փաթեթների բացմանը։

Մրցույթի հաղթող ճանաչվելու է այն կազմակերպությունը, որը կստանա ամենաբարձր միավոր՝ ըստ սահմանված չափանիշների․

▪ տեխնիկական առաջարկ – 50%,

▪ նմանատիպ փորձ և թիմի որակավորում – 30%,

▪ ֆինանսական առաջարկ – 20%։

Մրցույթի հաղթող մասնակցի հետ պայմանագիրը կկնքվի ոչ ուշ, քան մինչև 07/11/2025 թ.։

ԱՅԼ

«AI/ML և BI հարթակի մշակում և ներդրում» նախագծի TOR-ի պատճենի, լրացուցիչ տեղեկությունների համար կարող եք դիմել Ընկերությանը. hասցե՝ ք․Երևան, Վարդանանց 16, hեռ.՝ +374 11 560404։

ԲԱՑ ՄՐՑՈՒՅԹ՝ «ԱՐՄԵՆԻԱ ԻՆՇՈՒՐԱՆՍ» ԱՍՊԸ ԱՐՏԱՔԻՆ ԱՈՒԴԻՏԻ ԾԱՌԱՅՈՒԹՅԱՆ ԳՆՄԱՆ ՆՊԱՏԱԿՈՎ

«ԱՐՄԵՆԻԱ ԻՆՇՈՒՐԱՆՍ» ապահովագրական ՍՊԸ-ն (այսուհետ՝ Ընկերություն) իր 2025 թվականի գործունեության և տարեկան ֆինանսական հաշվետվությունների վերստուգման նպատակով արտաքին անկախ աուդիտորական կազմակերպության ընտրության համար հայտարարում է բաց մրցույթ (այսուհետ` Մրցույթ)

ՄԱՍՆԱԿԻՑՆԵՐ

Մրցույթին կարող են մասնակցել այն աուդիտորական կազմակերպությունները, որոնց մոտ բացակայում են «Աուդիտորական գործունեության մասին» ՀՀ օրենքի 15-րդ հոդվածի 4-րդ մասով սահմանված արգելքները, և որոնք միաժամանակ բավարարում են հետևյալ չափանիշներին`

▪ Ընկերության աուդիտն իրականացնող աուդիտորական կազմակերպությունը պետք է լինի «Հաշվապահական հաշվառման և աուդիտորական գործունեության կարգավորման և հանրային վերահսկողության մասին» Հայաստանի Հանրապետության օրենքով սահմանված մասնագիտացված կառույցի անդամ:

▪ Աուդիտ իրականացնող աուդիտորական կազմակերպությունը պետք է ունենա ապահովագրության կամ բանկային ոլորտի աուդիտի իրականացման առնվազն 5 տարվա փորձ, ընդ որում, այս չափանիշը չի տարածվում ըստ միջազգային խմբի տարեկան համախառն հասույթի մակարդակի առաջին 10 աուդիտորական ցանցերի լիիրավ անդամ հանդիսացող աուդիտորական կազմակերպությունների վրա։

▪ Աուդիտ իրականացնող աուդիտորական կազմակերպության պատասխանատու աուդիտորը պետք է լինի Մասնագիտացված կառույցի անդամ, ունենա ֆինանսական կազմակերպության աուդիտորի առնվազն 3 տարվա աշխատանքային փորձ և առնվազն 5 ֆինանսական կազմակերպության աուդիտի իրականացման փորձ, ինչպես նաև՝ Մասնագիտացված կառույցի կողմից տրված աուդիտորի որակավորում և միջազգային հաշվապահական կամ աուդիտորական որակավորման վկայական (օրինակ՝ Էյ-Սի-Սի-Էյ, Սի-Այ-Էս-Էյ)։

▪ Աուդիտորական խմբում ներգրավված աշխատակիցների առնվազն կեսը պետք է լինեն Մասնագիտացված կառույցի անդամ, ունենան աուդիտորական կազմակերպությունում առնվազն 3 տարվա աշխատանքային փորձ, ինչպես նաև՝ Մասնագիտացված կառույցի կողմից տրված աուդիտորի որակավորում կամ միջազգային հաշվապահական կամ աուդիտորական որակավորում (օրինակ՝ Էյ-Սի-Սի-Էյ, Սի-Այ-Էս-Էյ)։

▪ Ընկերության և աուդիտորական կազմակերպության միջև պայմանագիրը կարող է կնքվել մինչև 3 տարի ժամկետով։ Աուդիտորական կազմակերպությունը կարող է իրականացնել Ընկերության ֆինանսատնտեսական գործունեության աուդիտը անընդմեջ առավելագույնը 6 տարի, ընդ որում, տվյալ աուդիտորական կազմակերպության պատասխանատու աուդիտորը կարող է իրականացնել Ընկերության աուդիտը առավելագույնը 3 տարի։ Աուդիտորական կազմակերպությունը 6 տարի անընդմեջ աուդիտի իրականացման դեպքում չի կարող իրականացնել Ընկերության աուդիտը առնվազն 3 տարի։

ՊԱՅՄԱՆՆԵՐ

Մրցույթի պայմաններն են`

1) Աուդիտի իրականացման ժամկետն է` համապատասխան պայմանագրի կնքումից մինչև 2026թ․ ապրիլի 15-ը ներառյալ․

2) Աուդիտը պետք իրականցվի երկու փուլով՝ առաջին փուլի ավարտը պետք է լինի ոչ ուշ, քան 2025թ. դեկտեմբերի 27-ը: Առաջին փուլի ավարտից հետո, բայց ոչ ուշ, քան հաջորդ տարվա հինգերոդ աշխատանքային օրը, աուդիտորական կազմակերպությունը, ներկայացնում է կարճ միջանկյալ հաշվետվություն կատարված աշխատանքի վերաբերյալ պարտադիր ներառելով հետևյալ տեղեկատվությունը՝

ա) Ընկերության տեխնիկական պահուստների ճշտության, կիրառված մոտեցումների և այդ պահի դրությամբ ակնկալվող լրացուցիչ պահուստների ստեղծման անհրաժեշտությունը,

բ) ակտիվների արժեզրկման պահուստիների ճշտության և այդ պահի դրությամբ ակնկալվող լրացուցիչ պահուստների ստեղծման անհրաժեշտության վերաբերյալ,

գ) Ընկերության ֆինանսական ակտիվների հաշվառման ճշտության, կիրառված մոտեցումների և այդ պահի դրությամբ ակնկալվող լրացուցիչ ֆինանսական արդյունքների ստեղծման անհրաժեշտությունը։

Վերը նշված տեղեկատվությունը Ընկերությունը օգտագործելու է 2025թ. 4-րդ եռամսյակի ֆինանսական հաշվետվությունները կազմելու համար․

3) Աուդիտորական եզրակացությունը և «Նամակ ղեկավարությանը» (աուդիտորական հաշվետվություն) փաստաթղթերը պետք է կազմվեն հայերենով և անգլերենով, ընդ որում, երկու լեզուներով կազմված փաստաթղթերն էլ պետք է ունենան միևնույն իրավաբանական ուժ: Աուդիտորական եզրակացությունը և «Նամակ ղեկավարությանը» (աուդիտորական հաշվետվություն) փաստաթուղթը պետք է ներկայացվեն ոչ ուշ, քան մինչև 2026 թվականի ապրիլի 15-ը ներառյալ․

4) Աուդիտը պետք է կատարվի Ֆինանսական հաշվետվությունների միջազգային ստանդարտներին համապատասխան,

5) Աուդիտը պետք է ներառի Ընկերության կողմից ՀՀ կենտրոնական բանկ ներկայացվող հաշվետվությունների արժանահավատության ստուգում:

ԱՇԽԱՏԱՆՔՆԵՐ

Աուդիտի աշխատանքները պետք է ընդգրկեն՝

▪ 2025թ․ դեկտեմբերի 31-ին ավարտվող տարվա ֆինանսական հաշվետվությունների աուդիտը և աուդիտորական եզրակացության ներկայացումը,

▪ 2025թ․ տարեկան ֆինանսական հաշվետվությունների աուդիտի արդյունքում կազմված «Նամակ ղեկավարության» փաստաթղթի ներկայացումը:

ՎԱՅՐ

Մրցույթի կազմակերպման վայրն է ՝ ՀՀ, ք. Երևան, Վարդանանց 16, 1/1 տարածք։

ՀԱՅՏԵՐ

Մրցութային առաջարկները` Տեխնիկական հայտը և Ֆինանսական հայտը, առանձին, սոսնձված և ստորագրված փակ ծրարներով, մեկ կնքված փաթեթով, հայերենով պետք է ներկայացվեն Ընկերություն 2025թ․ սեպտեմբերի 10-ից մինչև 2025թ․ սեպտեմբերի 23-ը ներառյալ, յուրաքանչյուր աշխատանքային օր` ժ.09:00-ից մինչև ժ.17:30 ներառյալ։

Տեխնիկական հայտում Մրցույթի մասնակիցները պետք է ներկայացնեն հետևյալ տեղեկատվությունը`

ա) ծառայությունների մատուցման բնութագիրը,

բ) աուդիտի իրականացման և աուդիտորական եզրակացության ներկայացման ժամկետները,

գ) այն Ընկերությունների ցանկը, որոնց նախորդ հաշվետու տարվա ընթացքում մատուցվել են նմանատիպ ծառայություններ,

դ) աուդիտի աշխատանքներին մասնակցող` միջազգային հաշվապահական և (կամ) աուդիտորական որակավորում ունեցող աշխատակիցների (այդ թվում՝ աուդիտորական խմբի ղեկավարի) անունները, նրանց աշխատանքային փորձը և քանակը, ե) մրցույթի մասնակցի հայեցողությամբ` իր կողմից մատուցվող ծառայությունների որակը հաստատող այլ անհրաժեշտ տեղեկություններ:

Ֆինանսական հայտում Մրցույթի մասնակիցները պետք է ներկայացնեն հետևյալ տեղեկատվությունը`

ա) աուդիտի իրականացման ընդհանուր գինը (ներառյալ բոլոր տեսակի հարկերն ու ծախսերը),

բ) աուդիտի իրականացման ընդհանուր գնի վճարման եղանակն ու պայմանները,

գ) մասնագիտական գործունեության ձախողման կամ պայմանագրով ամրագրված պարտականությունների չկատարման ռիսկի ապահովագրությունը և ռիսկերի բավարար փոխհատուցման չափը,

դ) մրցույթի մասնակցի հայեցողությամբ՝ ծառայությունների մատուցման ֆինանսական կողմին վերաբերող, ինչպես նաև լրացուցիչ այլ տեղեկություններ:

Մրցույթի մասնակիցները տեխնիկական և ֆինանսական հայտերի հետ՝ մեկ ծրարով պետք է ներկայացնեն հավաստում առ այն, որ բավարարում են սույն հայտարարության մեջ նշված մրցույթի մասնակիցներին ներկայացվող չափանիշներին և մրցույթի պայմաններին:

ԱՆՑԿԱՑՄԱՆ ԿԱՐԳ

Մրցութային առաջարկները կբացվեն և կամփոփվեն մրցութային հանձնաժողովի կողմից 2025 թվականի սեպտեմբերի 23-ին, ժամը 17:30-ին, Ընկերությունում` ՀՀ, ք. Երևան, Վարդանանց 16, 1/1 տարածք հասցեում և մրցույթի մասնակիցները` վեջիններիս ցանկությամբ, կարող են ներկա գտնվել փաթեթների բացման գործընթացին:

Մրցույթի հաղթող կճանաչվի ամենաբարձր միավոր հավաքած աուդիտորական կազմակերպությունը:

Մրցույթում հաղթող ճանաչված անկախ աուդիտորական կազմակերպությունը «ԱՐՄԵՆԻԱ ԻՆՇՈՒՐԱՆՍ» ապահովագրական ՍՊԸ մասնակիցների արտահերթ ընդհանուր ժողովի կողմից հաղթող ճանաչված անձ հաստատվելուց հետո վերջինիս հետ համապատասխան պայմանագիրը կկնքվի ոչ ուշ քան մինչև 2025թ. հոկտեմբերի 15-ը:

ԱՅԼ

Լրացուցիչ տեղեկությունների, ինչպես նաև «ԱՐՄԵՆԻԱ ԻՆՇՈՒՐԱՆՍ» Ապահովագրական ՍՊԸ-ի կողմից անկախ աուդիտորական կազմակերպության ընտրության կարգի պատճենը ստանալու համար կարող եք դիմել` «ԱՐՄԵՆԻԱ ԻՆՇՈՒՐԱՆՍ» Ապահովագրական ՍՊԸ՝ ՀՀ, ք.Երևան, Վարդանանց 16 կամ զանգահարել +374 11 560404 հեռախոսահամարով։